Kabarin-dramatoa Lalao Ravalomanana
fankalazana ny Andro Iraisam-pirenena ho an'ny Vehivavy
8 MARSA 2010
Ry Vehivavy Malagasy Mpiray Tanindrazana,
Ny voalohan-teny dia fisaorana an'Andriamanitra. Tsy diso anjara tamin'ny fanomezam-pahasoavan'ilay Nahary isika, ka tratr'izao vaninandro izao.
Amin'izao andron'ny 8 marsa 2010 fankalazana ny Andro Iraisam-pirenena ho an'ny Vehivavy izao, dia raisiko ho fifaliana sy voninahitra ny miarahaba ny Vehivavy malagasy rehetra tsy an-kanavaka eran'ny Nosy, nahatratra ity andro anio ity. "Ny tiana tsy mahalavi-tany" hoy ny fitenenana, ary "ny elanelan-tany manamafy ny herim-pitiavana", ka izany arahaba izany dia sady atolotra am-pitiavana noho ny firaisan-kinantsika samy vehivavy, ary ho mariky ny firaisan-kina sy ny Fihavanana amin'ny Vahaoka Malagasy iray manontolo.
Izany arahaba izany koa, dia ombanay firarian-tsoa sy fanandratana ny vehivavy aty an-tanindrazana, satria miharihary toy ny vay an-kandrina ny fahasahiranana mianjady amin'ny Vahoaka Malagasy, noho ny fotoan-tsarotra lalovan'ny Firenena ankehitriny. Ary amin'izany, na dia anisan'ireo tra-pahavoazana mafy indrindra aza isika vehivavy amin'izao fotoana izao, dia hita fa sahy mijoro mandray andraikitra amin'ny fomba maro samihafa, mba ahitàna vaha-olana araka ny tokony ho izy, satria ny Reny Malagasy dia tia ny menaky ny ainy, ka mitsinjo mandrakariva ny taranaka fara-mandimby.
Jery todika momba izay vitan'ny firenena tsirairay avy, tato anatin'ny 15 taona, momba ny fampandrosoana ny anjara-toeran'ny vehivavy, ho hery mpamokatra feno, mitovy amin'ny lehilahy, izany no loha-hevitra isarihan'ny FIRENENA MIKAMBANA ny sain'izao tontolo izao, amin'ny fankalazana ity Andron'ny 8 marsa 2010 ity . Mankalaza ny "Beijing + 15" tokoa mantsy isika, amin'ity taona ity, satria feno 15 taona ilay FIHAONAMBE IRAISAIM-PIRENENA MOMBA NY VEHIVAVY NATAO TANY BEIJING, tamin'ny volana septambra 1995, izay nametrahan'izao tontolo izao ny Soridalana sy Soritrasa, ary ny Praograman'asa maharitra tokony ho tanterahina, na ny "Programme d'Action de Beijing".
Raha ny momba antsika Vehivavy Malagasy manokana no asiana teny, dia hizara amintsika ny ato am-poko aho, ary hindrana ny Tenin'ny Soratra Masina:
" Mahareta amin'ny fivavahana" (KOLOSIANA 4:2), fa ny vavaka no manova zavatra.
Na eo aza ny fahasahiranana sy ny olana mianjady, dia tsy hanariana ny finoana izany. Ny finoana sy ny fanantenana no mampitraka antsika, satria Jeso tompo sy mpamonjy no niteny hoe:
" Antsoy aho, dia ho valiako ianao". (Jeremia 33:3)
Ny tantaran'ny firenentsika dia ahitana Vehivavy mendrika sy mahery fo, sahy nijoro tamin'ny finoany: ry RASALAMA, maritiora voalohany, teo amin'ny Fianakaviamben'ny mpino protestanta sy Victoire RASOAMANARIVO, teo amin'ny Fianakaviamben'ny mpino katolika.
Koa raha mankalaza ny Andron'ny 8 marsa isika androany, dia mahatsiaro ny Vehivavy toy ireny, izay mpialoha lalana antsika, nitolona sy nanokana ny fiainany manontolo, ary nahafoy ny ainy mihitsy hamonjena ny Firenena.
Raha mankalaza ny Andron'ny 8 marsa koa isika androany, dia maneho sady manamafy indray ny fahavononantsika hatrany, hiezaka sy hikiry manoloana ny herisetra sy ny velikibay, ary ny fanitsakitsahana ny zon'olombelona sy ny zon'ny vehivavy, manoloana ireo olana sy sakatsakana, ary fanilikilihana, mivantana sy an-kolaka, mbola mihatra amintsika, ka tsy ahafahantsika mandray anjara feno eo amin'ny sehatry ny fitantanana sy ny fampandrosoana.
Ary raha mankalaza ny Andron'ny 8 marsa isika androany, dia sady maneho ny firaisankinantsika amin'ny vehivavy eran-tany no maneho amino, sy manao antso avo aminy, mba hanohana hatrany ny ezaka sy ny tolona ataon'ny vehivavy malagasy, indrindra amin'izao fotoan-tsarotra diavin'ny Firenena izao.
Noho ny zava-misy iainantsika, dia miharihary fa tena mpandimby marina ireo vehivavy modely teo aloha tokoa isika vehivavy malagasy ankehitriny."Tena vato namelan-kafatra sy kolokolo dimbin'ny vary, ary solofo dimbin'ny ala".
Koa dia mankahery antsika vehivavy rehetra aho amin'izany fahavononana sy fahasahiana mandray andraikitra izany, ka ny fijoroantsika eo anivon'ny Fokontany, ny Kaominina, ary ny Faritra misy antsika tsirairay avy, dia hampisongadina ny Firenena Malagasy.
Homba antsika mandrakariva Andriamanitra!
Commentaires
Enregistrer un commentaire